आ–आफ्नै रणनीति तय गर्न नेपाल र ओली समूहको आज छुट्टा छुट्टै बैठक बस्दै

२० जेष्ठ २०७८, बिहीबार १०:३४ मा प्रकाशित

काठमाडौं । दुई पक्षबीच बिवाद र कारवाहीको श्रृंखला चलिरहेको नेकपा एमालेको दुई समूहले बिहीबार छुट्टाछुट्टै बैठक बस्दै छ ।
पार्टी अध्यक्ष केपी शर्मा ओलीले वार्ता र एकताको नाममा आफ्नो पक्षलाई थप कमजोर बनाउने रणनीति लिएको आशंका व्यक्त गर्दै पार्टी कारवाहीमा परेकान नेता माधव नेपाल समूहले बिहान ११ बजे केन्द्रीय कमिटी बैठक बोलाएको छ ।

भर्जुअल मार्फत बस्ने आजको बैठकमा पछिल्लो समय दुई पक्षबीच दोस्रो पुस्ताले गरेको वार्ता र आगामी रणनीतिबारे छलफल हुने माधव नेपाल समूहका एक नेताले बताएका छन् ।

माधव नेपाल सहित ११ जनालाई पार्टीबाट निष्कासन गरेका ओलीले स्पष्टिकरण सोधिएको बाँकी १२ जनालाई अहिलेसम्म कुनै कारवाही गरेका छैनन् । पार्टी एकता जोगाउन अन्तिम कसरतमा लागेका माधव समूहका दोस्रो तहका नेता योगेश भट्टराई, गोकर्ण बिष्ट ओलीपक्षका नेताहरुसंग निरन्तर वार्ता र छलफलमा व्यस्त रहेका छन् ।

अनौपचारिक रुपमा भएको छलफलमा ओलीले आफ्ना दुत मार्फत माधव समूहले विपक्षी दलका नेता शेरबहादुर देउवालाई प्रधानमन्त्री बनाउन गरेको हस्ताक्षर फिर्ता लिए ०७५ जेठ २ को अवस्थामा पार्टीको बैठक बोलाउन तयार रहेको सन्देस प्रवाह गरेका छन् ।

ओलीको पछिल्लो नीतिलाई माधव नेपलले आफु थप कमजोर भएपछि अलमल्याउनको लागि फलिएको कार्ड भएको भन्दै अब ओलीको ललिपपमा आफु नफस्ने बताइसकेका छन् । पार्टीलाई पुर्नगठन गर्ने तयारीमा रहेका नेपाल सोही विषयमा केन्द्रीय सदस्यहरुको राय बुझ्न बैठक बोलाएका हुन् ।

यस्तै पटक पटक स्थगित हुँदै आएको एमाले ओली समूहको स्थायी कमिटी बैठक बिहीबार ४ बजे प्रधानमन्त्री निवास बालुवाटारमा बोलाइएको छ ।

माधव समूहलाई बाइपास गरी १९ जना स्थायी कमिटी गठन गरेका ओलीले पछिल्लो समय दोस्रो पुस्ताबीच भएको वार्ताबारे बैठकमा छलफल हुने केन्द्रीय कार्यलयका सचिव शेरबहादुर तामाङले बताएका छन् ।

यस्तै बैठकमा लुम्बिनी प्रदेशमा राष्ट्रियसभा उपनिर्वाचनमा पार्टीभित्रको अन्र्तघात, सुदूरपश्चिम प्रदेश सरकारमा सहभागि मन्त्रीहरुलाई कारवाही र समसामयीक विषयमा समेत छलफल हुने बताइएको छ ।

मंगलबार बसेको बैठकमा माधव समूहसंग अन्तिम अवस्थासम्म वार्ता जारी राख्ने बताए पनि ओलीले उक्त समूहका दोस्रो तहका नेताहरुलाई आफुतिर तान्न रणनीति बुनिरहेको आशंका माधव समूको रहेको छ ।

माधव–झलनाथ एमालेमा नफर्किने निष्कर्षमा रहेका ओली माधव समूहका दोस्रो र तेस्रो पूस्तालाई आफुतिर तान्ने रणनीतिमा लागेका छन् ।

प्रतिक्रिया दिनुहोस !