राष्ट्रियसभामा राष्ट्रपतिले सम्बोधन गर्ने

१७ असार २०७८, बिहीबार १६:०६ मा प्रकाशित

काठमाडौं । प्रतिनिधिसभालाई दुई पटक विघटन गरी कोमामा पुर्याएकी राष्ट्रपति विद्यादेवी भण्डारीले राष्ट्रियसभाको बैठकलाई सम्वोधन गर्ने चाहना व्यक्त गरेकी छिन् ।

राष्ट्रियसभाको आठौं बैठक आजबाट शुरु हुँदैछ । भण्डारीले आइतबार वा सोमबारको राष्ट्रियसभाको बैठकमा उपस्थित हुने र बैठकलाई सम्वोधन गर्ने कार्यक्रम तय भएको अध्यक्ष गणेशप्रसाद तिमिल्सिनाले जानकारी दिएका छन् ।

विहीबार बसेको राष्ट्रियसभा कार्यव्यवस्था परामर्श समितिको बैठकमा अध्यक्ष तिमिल्सिनाले राष्ट्रियसभाको बैठकलाई राष्ट्रपतिले सम्वोधन गर्न चाहेको जानकारी गराएका हुन् ।

संसद सचिवालयका एक कर्मचारीका अनुसार संसदीय अभ्यासमा यस अघि राष्ट्रप्रमुखको रुपमा रहेका राजा वा राष्ट्रपतिले राष्ट्रियसभा र प्रतिनिधिसभा बैठक आह्वान गर्ने र सरकारको नीति तथा कार्यक्रम प्रस्तुत गर्ने बाहेक अन्य अवस्थामा सदनमा उपस्थिति रहेको पाइदैन ।

प्रधानमन्त्री ओलीका हरेक असंवैधानिक कदमलाई आखाँ चिम्लिदै साथ दिए पछि उनको चौतर्फी आलोचना भएको छ । उनको कदमले राष्ट्रपति संस्थामाथि नै आँच आउन थालेपछि आफ्नो कदमको बचाउको लागि केही भनाइ सार्वजनिक गर्न खोजेको हुन सक्ने राष्ट्रिय सभाका एक सांसदले बताए ।

यस्तै आज बसेको कार्यव्यवस्था समितिको बैठकले पहिलो चरणमा दलका नेताहरुले सम्वोधन गर्ने र केही बेर बैठक स्थगन गरेर दोस्रो चरणमा गृहमन्त्रीलाई बोल्न दिने सहमति भएको राष्ट्रिय सभाका एक सदस्यले जानकारी दिए । संसद बैठक अपरान्ह ४ बजे संसद भवन नयाँ बानेश्वरमा बस्दै छ ।

प्रतिक्रिया दिनुहोस !