प्रचण्डको चेतावनी : आगो संग खेल्नु राम्रो होइन, खेल्न खोजे सकिन्छन्

३ श्रावण २०७८, आईतवार २२:२७ मा प्रकाशित

काठमाडौं। नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले एमाले अध्यक्ष केपी शर्मा ओली आफ्नै अहंकार, दम्भ घमण्डले सत्तात्युत भएको बताएका छन् । ओलीले लोकतान्त्रिक संस्कार कहिल्यै नदेखिएको समेत आरोप लगाए । दुई पटक सदन विघटनदेखि प्रधानमन्त्री शेरबहादुर देउवाको शपथ ग्रहण र संसद बैठकको घटनाक्रमसम्म आउँदा समेत उनमा लोकतान्त्रिक चरित्र नदेखिएको प्रचण्डले बताए ।

आइतबार प्रतिनिधि सभामा बोल्दै प्रचण्डले ओली यसरी प्रस्तुत हुन्छन् भन्ने थाहा पाएको भए आफू उति बेला पार्टी एकता नै नगर्ने बताए।

‘हुन त पूर्ववक्ता माननीयले विगतका अनुभव सुनाउनुभयो,’ उनले भने, ‘तर दुई तिहाइ बहुमतका प्रधानमन्त्रीले आफ्नो बहुमत हुँदाहुँदै प्रतिनिधि सभा विघटन गरेको भन्दा यो अनौठो घटना हो। यो विडम्बना मैले बोल्नुपर्दा, जसले गठबन्धनबाट राजनीतिक स्थायित्व होला भन्ने प्रस्ताव ल्याएको मान्छेले सदनको अघि उभिँदा मेरो अनुभूति के होला ? यस्तो दुर्दशा यति छिटो देख्नुपर्ला भनेको भए किन एकताको प्रस्ताव गर्थेँ होला ?’

ओलीका कुरामा सधैँ जालझेल, षड्यन्त्र, धोकाधडी हुने भन्दै प्रचण्डले उनको कुरा अब कसैले पनि नपत्याउने बताए। ‘उहाँको नेतृत्वमा हामी नबसेको भए त पत्याउँथ्यौं होला तर हामी अझै जिउँदै छौं। त्यसैले उहाँको जालझेलपूर्ण कुरा पत्याउँदैनौं,’ उनले भने।

उनले संविधानको धारा ७६ को उपधारा ५ बमोजिम शेरबहादुर देउवा प्रधानमन्त्री भएकोमा एमालेलाई टाउको दुख्नुपर्ने कारण नरहेको प्रस्ट पारे। एमालेका नेताहरूले संविधानको धारा ७६ को उपधारा ५ ले निर्दलीयता निम्त्याउने, लोकतन्त्र संकटमा पर्ने भनेर दिँदै आएको अभिव्यक्तिलाई लक्षित गर्दै प्रचण्डले गोहीको आँशु नबगाउन सुझाव दिए।

यस्तै प्रचण्डले ओलीतर्फ संकेत गर्दै उनले माओवादी आन्दोलन विभाजित भएको छ, यसलाई मिचिदिए हुन्छ भन्ने ठानेको भए हलुका नसोच्न आग्रह गरे । ‘आगोसँग खेल्ने कुरा राम्रो होइन, कति राम्रोसँग यो आगोलाई इनर्जीमा रुपान्तरणतिर ल्याइएको छ’,उनले भने, ‘यसलाई हेप्न थाल्नुभयो भने आगो फेरि सल्किनसक्छ । त्यो बुद्धितिर कोही पनि नजाऔं ।’

उनले निवर्तमान प्रधानमन्त्री ओलीलाई व्यक्तिगत अहंकार र दम्भ नराख्न आग्रह गरे ।‘‘व्यक्तिगत अहंकार र दम्भले इतिहास निर्माण हुँदैन, बनेको इतिहासलाई तपाईंले व्यक्तिगत दम्भले निमिट्यान्न पार्छु भन्ने ठान्नु भएको हो भने ब्लण्डर गर्दै हुनुहुन्छ’ उनले भने, ‘यसको फल भोग्नुहुन्छ भोग्दै जानुहुन्छ ।’

प्रतिक्रिया दिनुहोस !